Екі есімнен туған жылы белгі
Saya Medi — негізін қалаушының қыздары Сая мен Мединаның есімдерінен туған балалар киімі бренді. Сондықтан бұл жобада біз үшін ең маңыздысы жай ғана балаларға арналған жарқын логотип жасау емес, брендтің артындағы отбасылық жылылықты сақтап қалу болды.
Клиент есте оңай қалатын, балаларға жақын әрі ата-аналарға жағымды әсер беретін белгі қалады. Осы ойдан балалық шақтың қуанышын қарапайым әрі анық визуалды тілмен жеткізуге бағыт алдық.
Логотиптің негізгі белгісіне кемпірқосақты еске түсіретін түрлі түсті доғаларды таңдадық. Ортасындағы жұлдызша мен айналасындағы нүктелер композицияға ойыншылдық қосып, брендтің көңілді мінезін ашады.
Белгі әр тасымалдағышта бірдей танылып, брендтің жылы мінезін сақтауы маңызды болды. Сондықтан визуалды жүйені қаптамаға, жапсырмаға және күнделікті бренд материалдарына оңай бейімделетіндей құрдық.
Қанық түстер мен айқын типографика осы әсерді күшейтіп, белгіні балалар киімімен табиғи байланыстырады.
Түрлі түстер, доғалар мен шағын графикалық бөлшектер бір визуалдан екіншісіне өтіп, брендтің тұтас ырғағын қалыптастырады. Осылайша әр тасымалдағыш бөлек көрінсе де, бәрі бір әлемнің бөлігі болып қалады.
«Сапалы киім. Бақытты бала»
Бұл тіркес жалпы идеяны толықтырады: мұнда киім ғана емес, баланың көңіл күйі мен оған деген қамқорлық та маңызды.
Нәтижесінде Saya Medi үшін жеке тарихы бар, жылы әрі бір қарағанда танылатын белгі қалыптасты. Бізге бұл жобада ең ұнайтыны — екі қыздың есімінен басталған шағын отбасылық оқиғаның брендтің тұтас визуалды мінезіне айналуы.
