Заманауи джентльменнің стилі
CLASSIC YOU — талғам мен қарапайымдылықты бағалайтын ерлерге арналған киім бренді. Бұл жобада біз жапон минимализмінен шабыт алып, артық сән-салтанатсыз-ақ сапа мен стильді сездіретін визуалды бағыт қалыптастыруды көздедік.
Типографияда жіңішке, геометриялық сызықтарға сүйендік. Әріптердің арасындағы кеңістік пен олардың ерекше қиылысуы логотипке өзіндік ырғақ береді.
Брендтің негізгі идеясы — нағыз талғам көзге түсуге тырыспайды. Ол киімнің сапасынан, бөлшектердің үйлесімінен және адамның өзін ұстау мәнерінен байқалады. Осы ұстанымды логотиптің негізіне алдық.
Артық графикалық белгілер қолданбадық — бренд атауының өзі басты назарда. Бұл шешім жапон дизайнына тән қарапайымдылық пен әр бөлшекке мұқият қарау қағидасын сақтайды.
Түстер палитрасында қою көк, сұр және салқын реңктерді таңдадық. Олар брендге сабырлы, салмақты мінез беріп, ерлер киіміне тән ұстамды эстетиканы толықтырады.
“For the Modern Gentleman” — брендтің негізгі ұстанымын білдіретін тіркес. Біз үшін заманауи джентльмен — өзін көрсету үшін артық нәрсені қажет етпейтін, сапаны бағалайтын және жеке стиліне сенімді адам.
Логотипті киім жапсырмаларында, пакеттерде және басқа фирмалық материалдарда бірдей үйлесімді көрінетіндей ойластырдық.
Нәтижесінде CLASSIC YOU үшін жапон минимализмінің эстетикасын заманауи ерлер стилімен ұштастыратын визуалды бағыт қалыптасты. Оның мінезі — ештеңені дәлелдеуге тырыспайтын, бірақ әр бөлшегінен талғам сезілетін ұстамдылықта.
